फिचर लेखनका सर्वोत्कृष्ट र उत्कृष्ट १२ जना पत्रकार पुरस्कृत

असार, हेटौडा – नेपाल पत्रकार महासंघ मकवानपुर शाखाले आयोजना गरेको खुला फिचर समाचार लेखन प्रतियोगितामा १२ पत्रकार पुरस्कृत भएका छन् । हेटौंडा उपमहानगरपालिकाको सहकार्य र महासंघको आयोजनामा भएकोे फिचर लेखन प्रतियोगितामा सर्वोत्कृष्ट दुई सहित १० जना पत्रकारलाई पुरस्कृत गरिएको हो ।

उपमहानगरपालिका भित्रका शिक्षा, स्वास्थ्य, पूर्वाधार, कृषि, पर्यटन लगायत विकासका क्षेत्रमा भएका काम कारवाहीलाई फिचर समाचार बनाउने सर्वोत्कृष्ट महिला तर्फ सुनिता विष्ट र पुरुष तर्फ सुमन दाहाललाई पुरस्कृत गरिएको छ । उनीहरुलाई जनही नगद १५ हजार सहित प्रमाणपत्रले पुरस्कृत गरिएको थियो।

त्यसै, उत्कृष्ट १० जना पत्रकारमा प्रतीक्षा न्यौपाने, निशा गुरुङ्, प्रिया पौडेल, सुजन ढकाल, अनिल पराजुली, रवीन ढुङ्गाना, श्रीराम अर्जुन, खेम बोलखे, स्मिता अर्याल, र जमुना थिङ्ग रहेका छन् । उत्कृष्ट दश जनालाई नगद १० हजार सहित प्रमाण पत्र र झोलाले पुरस्कृत गरिएको थियो।

पत्रकार महासंघका अध्यक्ष मणिराज गौतमको अध्यक्षतामा भएको कार्यक्रममा हेटौडा उपमहानगरपालिका प्रमुख मिनाकुमारी लामाको प्रमुख आतिथ्यतामा भएको थियो।

कार्यक्रममा नेपाल पत्रकार महासंघ बागमती प्रदेशका पुर्व अध्यक्ष प्रताप विष्ट, उपाध्यक्ष रुपेश दुलाल, महासचिव कृष्ण सारु मगर, जिल्लाका निवर्तमान अध्यक्ष हरि हुमागाई, पूर्व अध्यक्ष राममणि दाहाल, विभिन्न पत्रकार संगठनका अध्यक्षहरुको आतिथ्यता रहेको थियो । फिचर लेखन प्रतियोगितामा १७ जनाको सहभागिता रहेको थियो ।