काठमाडौंमा सामूहिक बलात्कार, प्रहरीद्वारा नौ आरोपी पक्राउ

पुष, काठमाडौं – महिलालाई सामूहिक बलात्कार गरेको आरोपमा नेपाल प्रहरीले नौ जनालाई पक्राउ गरेको छ ।

काठमाडौंको बसपार्कमा एक महिलाले आफूमाथि सामूहिकरूपमा करणी भएको भनी दिएको जाहेरीका आधारमा अनुसन्धानका क्रममा उनीहरुलाई पक्राउ गरिएको महानगरीय प्रहरी परिसर काठमाडौंका प्रवक्ता दिनेशराज मैनालीले जानकारी दिए।

उनका अनुसार घटनाबारे मंगलबार अपराह्न ३ बजे प्रहरीमा जानकारी आएको थियो। उजुरी परे लगत्तै खोजतलास र अनुसन्धानमा निस्किएको प्रहरीले त्यसको पाँच घण्टा नबित्दै राति ८ बजे एक जनालाई पक्राउ गरेको थियो । उनीसँगको बयान र थप अनुसन्धानका क्रममा त्यसको तीन घण्टापछि गएराति ११ बजेसम्ममा सात जना नियन्त्रणमा लिएको मैनालीले जानकारी दिए।

उनका अनुसार थप खोजतलासका क्रममा बुधबार बिहान ९ बजेतिर एक जना र अपराह्न ४ बजे थप एक गरी अहिलेसम्म नौ जना आरोपी पक्राउ परेका छन् ।

उनीहरुले एक गेष्ट हाउसमा लगेर सामूहिक बलात्कार गरेको पीडितको आरोप छ । उनको स्वास्थ्य परीक्षण समेत गरिएको र घटनाको अनुसन्धान जारी रहेको जनाइएको छ। सबैले घटना स्वीकार गरको पनि प्रहरीले जानकारी दिएको छ ।