आदेश नआउँदा विप्लवका नेता माइला लामा छुटेनन्

फाल्गुन, संखुवासभा – नेत्रविक्रम चन्द विप्लव नेतृत्वको नेकपाका केन्द्रीय सदस्य तथा उपत्यका इन्चार्ज माइला लामा एक वर्षदेखि जिल्ला कारागार खाँदबारीमा छन् ।सरकार र विप्लव समूहबीच तीनबुँदे सहमति भएसँगै गृहमन्त्रालयले सो समूहका नेताहरुलाई रिहा गर्न सर्कुलर गरेको भए पनि विप्लवका नेता कार्यकर्ता छुटेका छैनन् ।

विप्लवका नेता कार्यकर्ता छाड्न अदालत वा जिल्ला प्रशासनबाट कुनै किसिमको पत्र आफूकहाँ नआएको खाँदबारी कारगार प्रमुख विनोद अधिकारीले बताए । खाँदबारी कारागारमा विप्लवका केन्द्रीय सदस्य लामा, संखुवासभा जिल्ला इन्चार्ज देव गुरुङ सहित १० नेता कार्यकर्ता रहेको कारागार प्रमुख अधिकारीले जानकारी दिए।

चन्द नेतृत्वको नेकपा र नेपाल सरकारबीच वार्ता सफल भएपछि नेकपाका कार्यकर्ता छाड्न गृहले परिपत्र गरेको जनाएको थियो। विप्लवका केन्द्रीय नेता लामा २०७६ साउन ५ गते काठमाडाैंबाट पक्राउ परेका थिए ।

विप्लवका नेता लामालाई विभिन्न जिल्ला हुँदै संखुवासभा ल्याइएको थियो। जिल्ला अदालत चैनपुरले संगठित रुपमा हातहतियार ओसारपसार, संचय तथा प्रयोग मुद्दामा २५ हजार रुपैयाँ धरौटी माग गरेको थियो । लामा तत्कालीन माओवादीको जनसांस्कृतिक महासंघको अध्यक्ष समेत थिए ।

तर, पार्टी विभाजनपछि मोहन वैद्य हुँदै उनी विप्लव समूहमा लागेका थिए। माओवादी जनयुद्धको क्रममा उनका हातका केही औंलामा क्षति पुगेका छन् भने सुन्ने र देख्ने क्षमता पनि कमजोर बनेको छ।

उनले सयौं क्रान्तिकारी गीत गाएका छन्, संगीत दिएका छन् र लेखेका पनि छन्। उनले संगीत दिएका धेरै गीतमध्ये नेत्रविक्रम चन्द (विप्लव)को शब्द रहेको ‘कसले बनायो दाजै उडी जाने बस’ चर्चित मानिन्छ।