बलिउड अभिनेता इरफान खानको निधन

बैशाख १७, मुम्बई – बलिउड अभिनेता इरफान खानको ५४ वर्षको उमेरमा निधन भएको छ । मुम्बईको कोकिलाबेन धिरुभाई अम्बानी अस्पतालमा उनको निधन भएको इन्डिया टुडेले जनाएको छ ।

स्वास्थ्यमा समस्या आएपछि मंगलबार उनलाई अस्पतालमा आइसियूमा राखिएको थियो । उनलाई कोलन इन्फेक्सन भएको थियो । मंगलबार अस्पतालले दिएकाे जानकारीअनुसार इरफानको छाती दुखेको कारण शारीरिक अवस्था अलि बिग्रेको थियो । साथै सास फेर्न पनि गाह्रो भइरहेको थियो ।

न्युरोएन्डोक्राइन ट्युमर भएपछि गत वर्ष लन्डनमा उपचार गराएर फर्किएका उनी कोकिलाबेन अस्पतालको चिकित्सक सँग स्वास्थ्योपचार गराइरहेका थिए । सन् २०१८ को मार्चमा उनलाई ट्युमर भएको पत्ता लागेको थियो । ट्युमर भएको थाहा पाएपछि उनी उपचारका लागि लन्डन गएका थिए, त्यहाँ करिब एक वर्ष बसेर सन् २०१९ मा भारत फर्किएका थिए ।

हालै इरफानकी आमा सइदा बेगमको पनि निधन भएको थियो । लकडाउनका कारण आमाको अन्तिम यात्रामा उपस्थित हुन नसकेपछि उनले भिडियो कलमार्फत आमाप्रति श्रद्धाञ्जली व्यक्त गरेका थिए ।