सागमा पदक बिजेता मकवानपुरे खेलाडी र प्रशिक्षकलाई सम्मान

हेटौडा – १३ औं दक्षिण एशियाली खेलकुद (साग) मा पदक जित्ने मकवानपुरका खेलाडी तथा प्रशिक्षकलाई सम्मान गरिएको छ । मंगलबार जिल्ला समन्वय समिति मकवानपुर र हेटौंडा उपमहानगरपालिकाले संयुक्त रुपमा १३ जना खेलाडी तथा प्रशिक्षकलाई सम्मान गरेको हो ।

जिल्ला खेलकुद विकास समिति मकवानपुरको समन्वयमा हेटौंडा उपमहानगरपालिकाले मकवानपुरबाट सागमा स्वर्ण जित्ने ४ जनालाई जनही १ लाख, रजत जित्ने ४ जनालाई जनही ७५ हजार र कास्य जित्ने ५ जनालाई जनही ५० हजार सहित सम्मानपत्र प्रदान गरेको हो ।

जिल्ला समन्वय समितिले स्वर्ण पदक विजेतालाई नगद २५ हजार, रजत पदक विजेतलाई २० हजार र कांस्य पदक विजेतलाई नगद १५ हजार रुपैयाँसहित सम्मान गरेको छ । उसुमा रजत पदक जिताउन सफल प्रशिक्षक विमल थापालाई पनि नगद सहित सम्मान गरिएको छ ।

उनीहरुलाई नगदसहित सम्मान गर्दै हेटौंडा–४ स्थित हुप्राचौरबाट नेपाली सेनाको न्याउली बाजा र पञ्चे बाजासहित हेटौंडा बजार परिक्रमा गराईएको हो । खेलाडी तथा प्रशिक्षकहरुलाई जिल्ला समन्वय समिति मकवानपुरका सभापति रघुनाथ खुलाल, हेटौंडा उपमहानगरपालिकाका मेयर हरिबहादुर महतलगायतले नगदसहित सम्मानपत्र प्रदान गरेका हुन्।