सुदूरपश्चिम प्रदेश सरकारले १६ वटा एम्बुलेन्स हस्तान्तरण
तामसालिङ खबर
कार्तिक २१, धनगढी – सुदूरपश्चिम प्रदेश सरकारले खरीद गरेका १६ वटा आधुनिक सुविधायुक्त एम्बुलेन्स प्रदेशका नौ वटै जिल्लाका स्वास्थ्य संस्थालाई हस्तान्तरण गरेको छ ।
सुदूरपश्चिम प्रदेश सामाजिक विकास मन्त्रालयद्वारा बुधबार धनगढीमा आयोजित एम्बुलेन्स हस्तान्तरण कार्यक्रममा प्रदेशका सामाजिक विकासमन्त्री कृष्णराज सुवेदीले सम्बन्धित स्थानीय तहका जनप्रतिनिधिलाई एम्बुलेन्स हस्तान्तरण गरेका थिए ।
मन्त्रालयले कैलालीको सेती प्रादेशिक अस्पताल र कञ्चनपुरको महाकाली अस्पताल लगायत अछामका चार, डडेल्धुरा, बैतडी, दार्चुला र बझाङका दुई/दुई तथा बाजुरा र डोटीमा एक/एक गरी १६ वटा स्वास्थ्यचौकी तथा अस्पताललाई एम्बुलेन्स हस्तान्तरण गरेको हो ।
सुदूरपश्चिमका अधिकांश स्वास्थ्य संस्थाका एम्बुलेन्समा साइरन र अक्सिजन सिलिण्डर बाहेकका सुविधा नभएको अवस्थामा नयाँ खरीद गरिएका एम्बुलेन्समा फुल एसी सहित मुटुको धड्कन नाप्ने मनिटर, अक्सिजन सिलिण्डर, सुरक्षाका अन्य थुप्रै उपकरण लगायतको सुविधा रहेको बताइएको छ ।
सामाजिक विकास मन्त्रालयका स्वास्थ्य महाशाखाका प्रमुख नरेन्द्रसिंह कार्कीले भन्सार छुट सहित कुल ६ करोड २५ लाख १२ हजारमा एम्बुलेन्स खरीद गरिएको जानकारी दिए । मन्त्री सुवेदीले हस्तान्तरण गरिएका एम्बुलेन्सको सञ्चालनका लागि चाहिने खर्च तथा मर्मत सम्भारका लागि सम्बन्धित स्थानीय तहले नै व्यहोर्ने गरी एम्बुलेन्स सुम्पिएको बताए । उनले आफ्नो सम्पत्ति जस्तै गरेर एम्बुलेन्सको सही सदुपयोग गर्न स्थानीय तहहरुलाई आग्रह गरे ।
मन्त्री सुवेदीले आगामी दुई महिनाभित्र ८८ वटै स्थानीय तहका प्रत्येक स्वास्थ्य संस्था तथा अस्पतालमा भिडियो एक्सरे गर्ने मेशिन उपलब्ध गराउने कार्यमा सरकार लागिरहेको बताउनु भयो ।
यो पनि पढ्नुहोस्
