बाल्यकालको गीतको भूमिकामा समृद्धी शाही अनुबन्धित
तामसालिङ खबर
काठमाडौं – बहुप्रतिक्षित फिल्म ‘प्रेमगीत-३’ मा ‘गीत’ पात्रको बाल्यवस्थाको सुहाउँदो क्यारेक्टरको लागि लामो समयको खोज अनुसन्धानपछि समृद्धी शाही ‘ठकुरी’लाई अनुबन्धित गरिएको छ । अब फिल्ममा समृद्धीले ‘गीत’ पात्रको वाल्य-अवस्थाको भूमिका निभाउने भएकी छन् ।
फिल्ममा बाल्य अवस्थाका ‘प्रेम’को भूमिकामा अनुभव रेग्मी र ‘गीत’को भूमिकामा समृद्धी देखिने भएका छन् । निर्माता तथा निर्देशक सन्तोष सेन र अर्का निर्देशक छेतेन गुरुङले कथामा सुहाउँदो भएकाले बाल कलाकारमा एउटा सम्भावना बोकेकी नयाँ बाल कलाकारको रुपमा समृद्धी शाहीको जन्म भएको बताउनुभएको छ ।
निर्माता सेनका अनुसार समृद्धी शाही अनुबन्धित भएसँगै ‘प्रेमगीत–३’ का लागि सम्पूर्ण कलाकार लक भएको छ । फिल्ममा शिब श्रेष्ठ, सुनिल थापा, सन्तोष सेन, प्रदीप खडका, मनिष रावत, पुष्कर कार्की, प्रेम पुरी, नव नायिका कृष्टिना गुरुङ, अनुभव रेग्मी र समृद्धी शाही मुख्य भूमिकामा देखिने भएको छ ।
निर्माण पक्षका अनुसार आगामी नयाँ वर्षको अवसरमा चैत २८ गतेबाट ‘प्रेमगीत–३’ दर्शकमाझ रिलिजमा आउनेछ ।
