‘बीर विक्रम २’ को प्रिमियर, शुक्रबारबाट देशभर प्रदर्शन हुने
तामसालिङ खबर
काठमाडौँ – शुक्रबार अर्थात् जेठ ३ गते बाट प्रदर्शनमा आउने चलचित्र ‘बीर विक्रम २’ले रिलिजको पुर्वसन्ध्यामा ग्राण्ड प्रिमियर सम्पन्न गरेको छ । चलचित्रकर्मी तथा संचारकर्मीको को राम्रो उपस्थिति रहेको प्रिमियरलाई ‘रोयल प्रिमियर’ नाम दिइएको थियो । जहाँ चलचित्रका मुख्य कलाकारले बाजाको तालमा निलो कार्पेटमा सुन्दरता छरेका थिए ।
प्रिमियरमा शिव श्रेष्ठ, भुवन केसी, पूजा शर्मा, सन्दीप क्षेत्री, अनु शाह, प्रमोद खरेल,कुन्जना घिमिरे लगायतका कलाकारले उपस्थिति जनाए । रोयल प्रिमियरमा चलचित्रका प्राविधिकहरुलाई सम्मान स्वरुप मायाको चिनो वितरण गरिएको थियो । चलचित्र हेरे पश्चात चलचित्र कर्मीले टिमको प्रसंशा गरे । अधिकाँसले चलचित्र ‘फुलडोज इन्टरटेनमेन्ट’ रहेको प्रतिक्रिया दिँदा निर्मण पक्ष हर्षित बनेको थियो ।
निर्देशक मिलन चाम्सले निर्देशन गरेको चलचित्र ‘बीर विक्रम २’ मा देशभक्त खनाल, मनोज केसी, विनिसा भण्डारी, बुद्धि तामाङ, क्षितीज सुवेदी, बाल कलाकार मनिष लिम्बु, कृजन गौतम लगायतका कलाकारको अभिनय रहेको छ ।
चलचित्रमा प्रदीप भारद्धाजको कथा, पटकथा तथा संवाद, कविराज गहतरातको कोरियोग्राफी, हिमाल केसीको द्धन्द्व, रञ्जीत गजमेर, ताराप्रकाश लिम्बु र राजनराज सिवाकोटीको संगीत, सुदीप बरालको डिओपी, नवराज उप्रेतीको छायांकन, बनिष शाहको सम्पादन रहेको छ ।
