हेटौँडामा दुई वटा सवारी दुर्घटना

हेटौँडा,जेठ । मकवानपुरको हेटौँडा बजारमा बुधबार एकेदिनमा दुई वटा सवारी दुर्घटनाका घटनाहरु भएका छन् । हेटौँडाको सानोपोखरा र उद्योग वाणिज्य संघ पिपलबोट नजिकै गरी दुई वटा सवारी दुर्घटना भएको हो । हेटौँडा उपमहानगरपालिका वडा नम्बर ५ सानोपोखरामा सडकमा बनाइएको डिभाईडरमा ठोकिएर टिफर दुर्घटना भएको हो । त्यस्तै पिपलबोट नजिकै टिफर र आईचर गाडीको बिचमा मोटरसाईकल च्यापिँदा अर्को दुर्घटना भएको हो ।

कान्तिराजपथ सडकखण्डको बिचमा फुल रोप्नको लागि बनाईएको डिभाईडरमा ना १ क ५९५२ नम्बरको टिफर ठोकिएर दुर्घटना हुँदा चालक चालक घाईते भएका छन् । उनलाई उपचारको लागि अस्पतालमा लगिएको छ । सवारी चालकहरुले डिभाईडरलाई याद नगरेको र डिभाईडर भएको ठाउँमा संकेत नभएकोले दुर्घटना हुने गरेको स्थानीयहरु बताउँछन् ।

त्यस्तै हेटौँडाको पिपलबोट नजिकै भैंसेबाट आउँदै गरेको ना ७ ख ५५५० नम्बरको टिफर र सोही दिसाबाट आईरहेको ना ४ ख ५०२० नम्बरको आईचर गाडीको बिचमा ना ३ प १४०२ नम्बरको मोटरसाईकल च्यापिँदा अर्को दुर्घटना भएको हो । दुर्घटनामा परेको मोटरसाईकल पूर्ण रुपमा क्षति भएता पनि कुनै मानविय क्षति भने भएन । सवारी चालकहरुको आपसी समझदारी पश्चात उनीहरु आ–आफ्ना गन्तव्य स्थानतर्फ लागेका छन् ।