मकवानपुरको भोर्लेनीमा प्रहरी चौकी भवन उद्घाटन

हेटौडा (बागमती) – मकवानपुरको बाग्मती गाउँपालिका वडा नम्बर ५ भोर्लेनीमा प्रहरी चौकी भोर्लेनीको नव निर्मित भवन आईतबार उद्घाटन गरिएको छ ।

जिल्ला प्रहरी कार्यालय मातहत रहेको प्रहरी चौकी भोर्लेनीको नव निर्मित भवन ३ नम्बर प्रदेश प्रहरी प्रमुख प्रहरी नायव महानिरीक्षक दिपक कुमार थापाले उद्घाटन गरेको जिल्ला प्रहरी कार्यालय मकवानपुरका प्रहरी प्रवक्ता प्रहरी निरिक्षक सागर विक्रम राणाले जानकारी दिएका छन् ।

उक्त भवन निर्माणका लागि बागमती गाउँपालिका वडा नम्बर ५ बस्ने निल बहादुर के.सी. र सोही स्थानमा बस्ने नारायण हुमागाईले ३ कठ्ठा जग्गा निःशुल्क रुपमा उपलब्ध गराएका थिए । राष्ट्रिय पुन–निर्माण प्राधिकरण कोषबाट प्राप्त १ करोड ३५ लाख ५१ हजार ७ सय एकासी रुपैयाँ १६ पैसा उक्त भवनको निर्माण गरिएको हो ।

कार्यक्रममा विशिष्ट अतिथी एवम् बागमती गाउँपालिकाका अध्यक्ष सर्केश घलान, जिल्ला प्रशासन कार्यालय मकवानपुरका प्रतिनिधि, जिल्ला प्रहरी कार्यालय मकवानपुरका प्रहरी उपरीक्षक मुकेश कुमार सिंह सशस्त्र प्रहरी बल नेपाल १४ नम्बर गण मकवानपुरका सशस्त्र प्रहरी उपरीक्षक श्याम कोईराला लगायत १०० जना स्थानिय बासिन्दाहरुको उपस्थिती रहेको थियो ।