मोटरसाईकल चोरेको आरोपमा विकास थिङ पक्राउ

हेटौडा – चोरी भएको मोटरसाईकल सहित हेटौँडा उपमहानगरपालिका वडा नम्बर १४ बस्ने २४ वर्षीय विकास थिङलाई पक्राउ गरिएको छ । मकवानपुर प्रहरीले उनलाई ग ११ प ४९४७ नम्बरको क्रस फायर मोटर साईकल चोरेको आरोपमा पक्राउ गरेको हो ।

बैशाख १७ गते मंगलबार साँझ करिब ५ बजेर ५० मिनेट गएको समयमा मकवानपुरको मनहरी गाउँपालिका वडा नम्बर ८ घर भई हाल हेटौँडा ५ बस्ने प्रविण बर्तौलाको क्रस फायर मोटरसाईकल हराएको थियो ।

बजार मुल्य करिब ६ लाख १० रुपैयाँ पर्ने उक्त ग ११ प ४९४७ नम्बर क्रस फायर मोटर साईकल हेटौँडा १५ मा पार्किङ गरी राखेको अवस्थामा चोरी भएको भन्दै जिल्ला प्रहरी कार्यालय मकवानपुरमा सूचना प्राप्त भएको थियो ।

सूचना प्राप्त भएपश्चात कार्यालयको निर्देशनमा मातहत कार्यालय समेतको टोली परिचालन गरी खोजतलास गर्दा विकासलाई उक्त मोटरसाईकल सहित हेटौँडा १४ सुगौलीबाट नियन्त्रणमा लिइएको थियो । जिल्ला प्रहरी कार्यालयबाट खटिएको बिशेष टोलीले बैशाख १८ गते साँझ साढे ७ बजेको समयमा उनलाई नियन्त्रणमा लिई कार्यालयमा ल्याएपश्चात अनुसन्धान थालिएको छ ।

उनको अपराध प्रमाणित भएमा मुलुकी अपराध संहिता २०७४ को परिच्छेद २० को चोरी तथा डाँका सम्बन्धि कसुरमा ३ बर्ष सम्म कैद र ३० हजार रुपैयाँसम्म जरिवाना समेत पर्ने बताइएको छ ।