बागमती गोल्डकप: मकवानपुर-११ सेमिफाइनलमा प्रवेश

पुष, हेटौडा (बागमती) – जनता उच्च माबिको खेलमैदानमा जारी पाँचौ बागमती गोल्डकप फुटबल प्रतियोगिताको घरेलु टिम मकवानपुर ११ सेमिफाइनलमा प्रवेश गरेको छ ।

बागमती गाउँपालिकामा आइतबारदेखि सुरु भएको प्रतियोगितामा मकवानपुर-११ ले विभागिय टिम नेपाल पुलिस क्लबलाई २-१ गोलअन्तरले पराजित गरेको हो ।

खेलको पहिलो हाफको ९ औं मिनेटमा जर्सी नम्बर १० का एलिस चौलागाईले एक गोल गरेर मकवानपुरलाई अग्रता दिलाए । दोस्रो हाफमा पुलिसका १२ नम्बर जर्सीका रवी पासवानले ५७ औं मिनेटमा गोल फर्काएपछि खेल बराबरीमा पुगेको थियो ।

खेलकै दोस्रो हाफको ६७ औं मिनेटमा जर्सी नम्बर ११ का अनिश महर्जनले थप एक गोल गरेपछि मकवानपुरको जित सुनिश्चित बन्यो । यो जितसंगै मकवानपुर-११ गोल्डकपको सेमिफाइनलमा प्रवेश गरेको छ ।

आजको जितसंगै खेलको म्यान अफ दि म्याच मकवानपुरका अनिश महर्जन घोषित भएका छन् । उनले नगद ५ हजार पुरस्कार प्राप्त गरे । प्रतियोगितामा खेल हेर्ने दर्शकलाई समेत मध्यनजर गरेर फ्यान अफ दि म्याचको पुरस्कार स्थानीय कमला मगरले प्राप्त गरेकी छिन् । उनले नगद २ हजार रुपैयाँ पुरस्कार प्राप्त गरेको आयोजक बागमती खेलकुद विकास समितिका अध्यक्ष टिकालाल श्रेष्ठले बताए ।

भोली (मंगलबार) हिमालयन शेर्पा क्लब र त्रिभुवन आर्मी फुटबल क्लबबीच खेल हुनेछ । खेल दिउँसो २ बजे हुनेछ ।