पाँचौ संस्करणको बागमती गोल्डकप आजबाट शुरु, उद्धघाटन खेलमा जावलाखेल युथको शानदार बिजयी

पुष, हेटौडा (बागमती) – पूर्वी मकवानपुरको बागमती गाउँपालिकामा आइतबारबाट पाँचौ बागमती गोल्डकप फुटबल प्रतियोगिता शुरु भएको छ ।

बागमती खेलकुद विकास समितिको आयोजनामा भएको फुटबल प्रतियोगितामा बागमती प्रदेशको सामाजिक विकास मन्त्री कुमारी मोक्तानले उद्घाटन भएको थियो ।

प्रतियोगिताको उद्घाटन कार्यक्रममा मन्त्री मोक्तानले बोल्नु हुँदै, ‘देशमा संघियता, गणतन्त्र आएपछि धेरै भन्दा धेरै खेलकुद प्रतियोगिता आयोजना हुन थालेको बताउनुभयो’ । उहाँले यस्ता प्रतियोगिताले राष्ट्रिय/अन्तर्राष्टिय रुपमा खेलाडी चिनाउन तथा खेलाडी उत्पादन गर्न मद्धत पुगेको बताउनुभयो । प्रदेश सरकारले खेल क्षेत्रको विकास गर्न महत्वपूर्ण योजना राखेर कार्यक्रम गरिरहेको उहाँको भनाई छ ।

बागमती खेलकुद विकास समिति अध्यक्ष टिकालाल श्रेष्ठको अध्यक्षतामा भएको कार्यक्रममा बागमती प्रदेश सभा सदस्य प्रेमबहादुर पुलामी, बागमती गाउँपालिका अध्यक्ष सर्केश घलान, उपाध्यक्ष फणिन्द्र कुमार तिमल्सिना, हेटौंडा उपमहानगरपालिका उपमेयर राजेश बाँनिया, बकैया गाउँपालिकाका उपाध्यक्ष भक्तबहादुर खत्री, नेपाली कांग्रेस बागमती गाउँपालिका सभापति भक्त बहादुर राई, नेकपा एमालेका चन्द्र राई, माओवादी केन्द्र गाउँपालिका ईन्चार्ज ज्ञानसागर भोलन लगायतको उपस्थिती रहेको थियो ।

आयोजक बागमती खेलकुद विकास समितिलाई हराउदै जावलाखेल युथ क्लबको शानदार जित शुरुवात

बागमतीको जनता माविको खेलमैदानमा आजबाट शुरु भएको पाँचौ बागमती गोल्डकप फुटबल प्रतियोगिताको उद्धघाटन खेलमा जावलाखेल युथ क्लबले बिजयी सुरुवात गरेको छ । जावलाखेलले आयोजक टिमलाई ५–० गोल अन्तरले पराजित गर्दै सेमिफाइनलमा प्रवेश गरेको छ ।

हिसुव थपलियाको ह्याट्रिक गोलले जावलाखेललाई सिधैं सेमिफाइनलमा प्रवेश गराउन मद्धत पुग्यो । उनले खेलको दोस्रो हाफको ६५ औं ७० र ७२ औं मिनेटमा गोल गरे । खेलको पहिलो हाफमा सुनिल खड्काले र समिराज थोकरले एक/एक गोल गरे ।

ह्याट्रिक गरेका हिसुब म्यान अफ दि म्याच घोषित भएका छन् । उनले नगद ५ हजारसहित ट्रफी र मेडल प्राप्त गरेका छन् । गोल्डकपको सोमबार हुने दोस्रो खेलमा मकवानपुर –११ र नेपाल पुलिस क्लबबीच खेल हुनेछ । खेल दिउँसो २ बजे हुने आयोजकले जनाएको छ ।

प्रतियोगितामा विजेता टिमले नगद ८ लाख, उपविजेताले ४ लाखसहित शिल्ड, मेडल र प्रमाणपत्र प्राप्त गर्नेछन् । माघ ३ गतेसम्म आयोजना हुने प्रतियोगितामा राष्ट्रिय, अन्तर्राष्ट्रिय तथा स्थानीय गरी १० टिमको सहभागिता रहेको छ ।