क्षेत्रीय आमसभालाई सम्बोधन गर्दै बानियाँले भने, ‘जनताको दैनिक जनजीवन सहज बनाउने काममा ध्यान दिने छु’

मंसिर, मनहरी (हेटौंडा) – नेपाली कांग्रेस बागमती प्रदेशका सभापति एवम् मकवानपुर क्षेत्र नम्बर २ (ख) का लोकतान्त्रिक बाम गठबन्धनका उम्मेदवार ईन्द्रबहादुर बानियाँले जनताको दैनिक जनजीवन सहज बनाउने काममा आफूहरुले ध्यान दिने प्रतिवद्धता जनाएका छन् ।

लोकतान्त्रिक बाम गठबन्धनको बिहीबार मनहरीमा भएको क्षेत्र स्तरीय आमसभालाई सम्बोधन गर्दै बानियाँले गठबन्धनको सरकार बनेपछि विकट क्षेत्रमा सडक, खानेपानी, बिजुली विस्तार जस्ता काममा तीव्रता दिइने बताएका हुन् ।

‘मुलुक संघीयतामा गइसकेपछि बनेका स्थानीय तहहरुले धेरै राम्रा कामहरु गरेका छन्, विकट गाउँको टोल टोलमा सडक पुगेको छ, बिजुली, खानेपानी लगायतको विकास भएको छ ।’ बानियाँले भने–‘हामी अब विकटलाई निकट बनाउने अभियानमा छौं । हरेक वडालाई पालिका कार्यालयसम्म र हरेक पालिकालाई राष्ट्रिय राजमार्गसम्म जोड्न हामी दत्तचित्त भएर लाग्छौं ।’

लामो संघर्षपछि प्राप्त वर्तमान व्यवस्थाकै कारण गाउँगाउँमा बाटो, पानी, बिजुलीको सुविधा पुगेको स्मरण गर्दै बानियाँले यही व्यवस्था सकाउन एमाले र त्यसका अध्यक्ष केपी ओली लागेको भन्दै अब जनताले त्यस्तो पार्टीलाई चिनिसकेको बताए । गठबन्धनले जित्दा मुलुकले नै जित्ने र हार्दा मुलुक हार्ने उनको तर्क थियो । ‘विगतमा एमालेको तीनै तहको सरकार हुँदा केही काम भएनन् । ओली र उनका मान्छेहरुले खाली हावा गफ मात्र गरे, काम गरेनन् ।’ बानियाँले भने-‘यो कुरा जनताले बुझेर विगतको स्थानीय तहको निर्वाचनमा गठबन्धनको पक्षमा जनता उर्लिए । अबको निर्वाचनमा पनि गठबन्धनको जीत सुनिश्चित भएको छ ।’

आफ्नो निर्वाचन क्षेत्रका स्थानीय तहको उदाहरण दिँदै बानियाँले विगतमा एमालेले जितेका सबै स्थानीय तह अहिले कांग्रेस र माओवादीमय बनेको बताए । विपन्न वर्गको निशुल्क स्वास्थ्य बिमा, निशुल्क शिक्षा र विपन्नलाई आवास अबको निर्वाचनपछि बन्ने सरकारको पहिलो प्राथमिकता हुने बानियाँले बताए । ‘अबको लडाई भनेको व्यवस्था परिवर्तन गर्नु हो । गरिबलाई आय, गरिबलाई न्याय हाम्रो प्राथमिकता हुनेछ ।

उपचार गर्न नसकेर कोही मर्न नपरोस् भनेर गरिबलाई २ लाखसम्मको निशुल्क स्वास्थ्य बिमा गछौैं । अबको ५ वर्षमा प्रदेशभित्रका विपन्न पहिचान गरी १० हजार घर बनाउनेछौं ।’ बानियाँले भने–‘ यो हाम्रो संकल्प हो । जनताले गरेको आत्मदानको सम्मान गर्छाैं, हामी ओलीले जस्तो रेलको कुरा, पानी जहाजको कुरा गरेर जनतालाई ढाँट्दैनौं ।’

नेपालमा गणतनत्र र संघीयता आएपछि दलित, महिला, पिछडिएको वर्ग, जनजाति, सिमान्तकृत, अल्पसंख्यक सबैको अधिकार र उनीहरुको प्रतिनिधित्व सुनिश्चत भएको भन्दै बानियाँले यहि व्यवस्थामाथि नै एमाले र तीनका अध्यक्ष ओलीले धावा बोलेको स्मरण गरे । बागमती प्रदेशमा एमालेको नेतृत्वमा साढे तीन वर्षसम्म सरकार चले पनि विकासको काममा भने पछि परेको उनको भनइ थियो । गठबन्धनको काँधमा प्रदेश सरकारको जिम्मेवारी आएपछि आफ्नो क्षेत्रमा मात्रै डेढ अर्बभन्दा बढी बजेट विनियोजन भएको बानियाँले बताए ।

नेकपा माओवादी केन्द्र मकवानपुर क्षेत्र नम्बर २ (ख) का अध्यक्ष हविल चेपाङको अध्यक्षतामा भएको कार्यक्रममा गठबन्धनका मकवानपुर क्षेत्र नम्बर २ प्रतिनिधि सभाका उम्मेदवार विरोध खतिवडाको प्रमुख आतिथ्यतामा भएको थियो। त्यस्तै कार्यक्रममा नेकपा एकीकृत समाजवादीका केन्द्रीय सदस्यद्वय राजाराम स्याङतान, घनप्रसाद गौतम, नेपाली कांग्रेस मकवानपुर सभापति बुद्ध लामा, नेकपा एकीकृत समाजवादी जिल्ला अध्यक्ष सुर्यचन्द्र न्यौपाने, नेकपा माओवादी केन्द्र केन्द्रीय सदस्य विजय गौतम, मानकुमारी नेपाली, कांग्रेस बागमती प्रदेश सदस्य सन्तबहादुर चेपाङ, नेकपा माओवादी केन्द्रका प्रदेश सदस्य ओमबहादुर ग्लान, नेपाली कांग्रेस मकवानपुर क्षेत्र नम्बर २ का सभापति लोकबहादुर मुक्तान, कांग्रेस प्रतिनिधिसभा २ (ख) का सभापति रञ्जन कालाखेती लगायतले मन्तव्य व्यक्त गरेका थिए ।