किरण माल्दिभ्समा उत्कृष्ट गोलकिपर घोषित
तामसालिङ खबर
साउन, माले – नेपाली गोलकिपर किरणकुमार लिम्बू माल्दिभ्सको लिगमा उत्कृष्ट गोलकिपर घोषित भएका छन्। सोमबार सकिएको माल्दिभ्सको शीर्ष डिभिजनको लिग ‘धिवेदी प्रिमियर लिग’ मा किरण उत्कृष्ट गोलकिपर घोषित हुन सफल भएका हुन्।
किरण आबद्ध माजिया एससीले सिजनको लिग जितेको थियो। माजियाले लिग जित्दा किरणले उत्कृष्ट प्रदर्शन गरेका थिए। माजियाले लगातार तीन सिजन लिगको उपाधि जितेको हो। जितसँगै माजिया एएफसी कपको समूह चरणमा छनोट हुन समेत सफल भएको छ।
किरण गत मंसिरमा २०२१/२२ सिजनका लागि माजियामा आबद्ध भएका थिए। किरणले गत सिजन भारतको पञ्जाव एफसीबाट आइ लिग खेलेका थिए। गत सिजन आइ लिगमा पनि उनले उत्कृष्ट गोलकिपरको अवार्ड जितेका थिए।
राष्ट्रिय टिम र क्लब फुटबलमा उत्कृष्ट प्रदर्शन गरेका किरणले गत वर्ष एसियाको साताको उत्कृष्ट खेलाडीको अवार्ड पाएका थिए। यसअघि सन् २०१८ मा पनि किरण माल्दिभ्सको लिगमा उत्कृष्ट गोलकिपर घोषित भएका थिए। किरणले सो सिजनमा टिसी स्पोर्ट्सलाई माल्दिभ्सको लिगको उपाधि जिताउन उत्कृष्ट प्रदर्शन गरेका थिए।
यो पनि पढ्नुहोस्
