‘रातो टीका निधारमा’ ट्रेलर रिलिज (भिडियो)

भदौ १८, हेटौडा – हाल प्रदर्शन भैरहेको चलचित्र ‘मारुनी’ बाट प्रशंसा बटुलिरहेकी अभिनेत्री साम्राज्ञी राज्यलक्ष्मी शाहले निर्देशक अशोक शर्माका छोरा अंकित शर्मा सँग रोमान्स गरेको चलचित्र ‘रातो टीका निधारमा’ को ट्रेलर रिलिज भएको छ ।

असोज १० गतेबाट प्रदर्शनमा आउन लागेको चलचित्रले वैदेशिक रोजगारीको कथा वाचन गर्ने ट्रेलरले प्रस्ट्याउँछ । ट्रेलरमा देखाइए अनुसार अभिनेत्री साम्राज्ञीले यो फिल्ममा गाउँले युवतीको भूमिका निभाएकी छन् । उनले पहिलो पटक यस प्रकारको भूमिका निभाएकी हुन् ।

अंकित भने वैदेशिक रोजगारीमा पठाउने एजेन्टको भूमिकामा छन् । कमेडी फ्लेवरमा तयार पारिएको ट्रेलरले फिल्मप्रति दर्शकमा उत्सुकता र कौतुहलता जागृत गर्न सफल हुने देखिन्छ ।

चलचित्रमा साम्राज्ञी र अंकित सँगै नीता ढुंगाना, रविन्द्र झा, बुद्धि तामाङ, खुश्बु खड्का, राजाराम पौडेल, शिवहरी पौडेल, लक्ष्मी गिरी, बसुन्धारा भुषाल लगायतका कलाकारहरुको समेत अभिनय छ । निर्देशक शर्माकी श्रीमती किरन शर्मा र छोरी कृति शर्माले फिल्मको निर्माण गरेका हुन् । फिल्ममा शम्भुजित बाँस्कोटा र कल्याण सिंहको संगीत छ ।

अशोक शर्मा निर्देशित फिल्मको गीतमा प्रमोद खरेल, मेलिना राई, निशान भट्टराई र अस्मिता अधिकारीले आवाज भरेका छन् । फिल्मका लागि सहदेव ढुंगाना, डा.कृष्णहरि बराल र रवि मल्लले गीत लेखेका छन् । निर्देशक शर्माकी छोरी कृति फिल्मकी सहायक निर्देशक हुन् । फिल्मलाई मित्र देव गुरुङले सम्पादन गरेका छन् ।

ट्रेलर हेर्नुहोस –