प्रथम मनहरी अध्यक्ष कप आजदेखि शुरु हुने

हेटौडा (मनहरी) – पश्चिम मकवानपुरको मनहरी गाउँपालिका वडा नम्बर ७ स्थित रमौलीमा शुक्रबारदेखि हुने ‘प्रथम मनहरी अध्यक्ष कप २०७६’ को तयारी पुरा भएको छ । मनहरी युवा क्लबको आयोजनामा हुने खेलमा ९ वटा टिम सहभागी हुने क्लबका अध्यक्ष समिप श्रेष्ठले जानकारी दिए ।

प्रतियोगिताको पहिलो दिन उद्घाटन खेलमा आज वडा नम्बर ३ र वडा नम्बर ७ भिड्नेछन् । भोलिको उदघाटन खेल प्रस्तावित मदन भण्डारी रंगशालामा दिउँसो ३ बजे सुरु हुने छ । प्रतियोगिताको बिजेताले नगद ५० हजार ,उपबिजेताले ३० हजार रुपैयाँ , मेडल, प्रमाणपत्र तथा ट्रफी समेत प्राप्त गर्नेछन् भने बिधागत रुपमा उत्कृष्ट खेलाडीहरुले नगद ५ हजार र ट्रफी प्राप्त गर्नेछन् ।

स्थानीय स्तरका खेलाडीहरुको मनोबल बृद्धि गराउने तथा खेलाडी उत्पादन गर्ने उद्धेश्यले प्रतियोगिताको आयोजना गरिएको अध्यक्ष श्रेष्ठले बताए । क्लबको आयोजनामा हुने प्रतियोगिता जेठ २४ गते देखि ३२ गते सम्म सञ्चालन हुनेछ ।

प्रतियोगिता सञ्चालनको लागि ६ लाख भन्दा बढि खर्च लाग्ने अनुमान गरिएको छ । प्रथम अध्यक्ष कप सञ्चालनको लागि मनहरी गाउँपालिका, रिद्धिसिद्धि सिमेन्ट लगाएतका विभिन्न संघसस्थाहरुबाट सहयोग प्राप्त भएको छ ।