हेटौँडा बसपार्कको होटलबाट महिला सहित ३ जना पक्राउ

हेटौँडा, बैशाख । मकवानपुरको हेटौँडा उपमहानगरपाकिला वडा नम्बर १० बसपार्क क्षेत्रमा सञ्चालित एक होटलमा एक महिलालाई आपत्तिजनक अवस्थामा भेटेपछि प्रहरीले महिलासहित होटल सञ्चालक र कामदारलाई पक्राउ गरेको छ । हेटौँडा १० मा रहेको घलान होटल एण्ड लजमा अनैतिक कार्य हुने गरेको भनि प्राप्त सुचनाको आधारमा बिहीबार गरेको जाँचका क्रममा दिउँसो करिब साढे २ बजे होटलको कोठा नम्बर ७ मा एक महिलालाई आपत्तिजनक अवस्थामा फेला परेपछि प्रहरीले होटल एण्ड लजका संचालक सोही स्थानमा बस्ने बर्ष ३७ को गणेश बहादुर घलान, सोही होटलमा काम गर्ने हेटौँडा २ का ४१ वर्षीय श्रीकृष्ण खड्के र महिलालाई नियन्त्रणमा लिएको प्रहरीले जनाएको छ ।

लजका संचालक घलानले अनैतिक कार्यको लागि जानीजानी आफ्नो होटल उपलब्ध गराएको आरोप लगाइएको छ । सो होटलको तेस्रो तल्लामा रहेको कोठा नम्बर ७ मा महिलालाई आपत्तिजनक अवस्थामा फेला पारी सोधपुछ गर्दा उक्त स्थानमा अनैतिक कार्य हुने गरेको बुझिएको भन्दै जिल्ला प्रहरी कार्यालयबाट खटिएको प्रहरी टोलीले अनैतिक कार्यमा संलग्न रहेको ३ जनालाई पक्राउ गरेको हो ।

पक्राउ परेकाहरुलाई सार्वजनिक हित, स्वास्थ्य, सुरक्षा, सुबिधा र नैतिकता बिरुद्धको कसुर अपराध अन्तर्गतका मुद्धामा मकवानपुर जिल्ला अदालतबाट म्याद थप गरी जिल्ला प्रहरी कार्यालयको हिरासतमा राखी आवश्यक अनुसन्धान थालिएको प्रहरीले जनाएको छ ।