पदमपोखरीको सनराईज बोर्डिङ स्कूलको क्यान्टिनमा आगलागी
चन्द्र घलान 
हेटौडा – हेटौँडा उपमहानगरपालिका १३ पदमपोखरीमा रहेको सनराईज ईङ्ग्लिस बोर्डिङ स्कूलमा बिहीबार बिहान ग्यास सिलिण्डर पड्कीएर आगलागी भएको छ । बिहान करिब साढे ६ बजेको समयमा विद्यालय हातामा रहेको क्यान्टिनमा ग्यास सिलिण्डर विस्फोट भएपछि आगलागी भएको हो ।
पहिले एउटा सिलिण्डर विस्फोट भएर आगलागी हुन सुरु भएपछि पूनः अर्को सिलिण्डर विस्फोट भएको थियो । सिलिण्डर विस्फोटबाट आगलागी भएपछि ३ कोठे भवन करिब पूर्णरुपमा क्षति भएको रासस सहकर्मी रिपेश दाहालले जानकारी दिए । सिलिण्डर विस्फोट हुँदा क्यान्टिनका जस्ताहरु उडेर नजिकै रहेको घरहरुसम्म पुगेको प्रत्यक्षदर्शीहरुले बताए ।
आगलागीमा परि क्यान्टिनमा भएका करिब ५ लाख बराबरको सामाग्री जलेर नष्ट भएको छ । क्यान्टिन संचालक राजेन्द्र लामा समेत आगलागीमा परि सामान्य घाईते भएका छन् । उनको कपाल डढ्नुका साथै सामान्य चोट लागेको र अवस्था सामान्य रहेको बताइएको छ ।
आगलागीलाई स्थानीयवासी तथा हेटौँडा उपमहानगरपालिकाको दमकल प्रयोग गरी नियन्त्रणमा लिइएको छ । क्यान्टिन क्षेत्रमा आगलागी भएता पनि अध्ययन सञ्चालन हुने कक्षाकोठाहरु भने सुरक्षित रहेको विद्यालयका प्रिन्सीपल विष्णु श्रेष्ठले जानकारी दिए ।
कक्षाकोठाहरु सुरक्षित रहेकाले विद्यालयमा नियमित अध्ययन सञ्चालन हुने उनले बताए ।
यो पनि पढ्नुहोस्
