तिन नम्बर प्रदेश सरकारले बैशाखमा लगानी सम्मेलन गर्ने

हेटौडा – तिन नम्बर प्रदेशको सरकारले देशभित्रको लगानीकर्तालाई आकर्षित गर्ने उद्येश्यले लगानी सम्मेलन गर्ने भएको छ । संघिय सरकारले लगानी सम्मेलन सम्पन्न गरेको एक महिना भित्रै मै तिन नम्बर प्रदेशको सरकारले पनि लगानी सम्मेलन गर्न लागेको हो ।

आगामी वैशाख ६ र ७ गते चितवनमा प्रदेशस्तरीय लगानी सम्मेलन हुने मुख्यमन्त्री डोरमणी पौडेलका प्रेस संयोजक प्रकाश दाहालले बताए । लगानीकर्तालाई प्रदेशका विभिन्न क्षेत्रमा लगानी गर्न प्रेरित गर्ने उदेश्यले निजी क्षेत्रका व्यवसायीलाई भेला पारेर लगानीका लागि अनुरोध गर्न लागीएको स्रोतले बताएको छ ।

१ सय ५० सम्भावित लगानीकर्ता तथा विज्ञ लगायत दुई सयको सहभागितामा सम्मेलन गर्न लागिएको बताइएको छ । देशका लगानीकर्तालाई प्रदेशमा लगानीका लागि प्रेरित गर्ने आधारतय भएको प्रदेशसभा सदस्य श्यामकुमार बस्नेतले बताए । सम्मेलनपछि लगानीकर्ता प्रदेशको पर्यटन, कृषि, उद्योग लगायतको क्षेत्रमा लगानीका लागि आकर्षित हुने योजना आयोगको अनुमान रहेको छ ।

तिन नम्बर प्रदेशको फलफूल उत्पादन, जडीबुटी तथा पशुपालनका दृष्टिले महत्वपूर्ण रहेको यो प्रदेशमा कृषिक्षेत्र पनि लगानीका लागि उपयुक्त क्षेत्र रहेको कृषि क्षेत्रका अगुवा बताउँछन् ।

तथ्याङ्क अनुसार देशका ११ औद्योगिक क्षेत्रमध्ये तिन नम्बर प्रदेशमा चारवटा औद्योगिक क्षेत्र छन् । बालाजु औद्योगिक क्षेत्र, पाटन औद्योगिक क्षेत्र, भक्तपुर औद्योगिक क्षेत्र र हेटौंडा औद्योगिक क्षेत्रमा देशमा भएका बहुराष्ट्रिय उद्योगहरु मध्ये ८० प्रतिशत भन्दा बढी उद्योगहरु यो प्रदेशमा छन् ।

औद्योगिक उत्पादनको अभिबृद्धि प्रदेशको समृद्धि भन्ने मुलनारा सहित प्रदेश सरकार र नीति तथा योजना आयोग लागि परेको अवस्थामा लगानीकर्ताले सरकारको दरिलो साथ पाउने बताइएको छ ।

सम्मेलन मार्फत सरकारका वा नीजि क्षेत्रका कमीकमजोरीहरु पत्ता लगाउने र तिनलाई सुधार गर्ने सरकारको रणनीति रहेको स्रोतले जनाएको छ ।