मनहरी ५ मा दोस्रो वडाअध्यक्ष कप फुटबल प्रतियोगितामा आयोजक सुर्यकिरणको बिजयी शुरुवात

कार्तिक, हेटौडा (मनहरी) – मनहरी ५ को टोल स्तरीय दोस्रो वडाअध्यक्ष कप फुटबल प्रतियोगिता शुरु भएको छ। बसन्तपुर स्थित राप्ती खेल मैदानमा मंगलबारबाट शुरु भएको हो।

सुर्य किरण युवा क्लबको आयोजना तथा ५ नम्बर वडा स्तरिय खेलकुद बिकास समितिको समन्वयमा टोल बिकास स्तरिय दोस्रो वडा अध्यक्ष कप नकआउट फुटबल प्रतियोगितामा पाँच टोल विकास संस्थाबाट ९ टिम सहभागी रहेको छ ।

प्रतियोगिताको उद्घाटन खेलमा दुग्देश्वोर टोल बिकास संस्थालाई १-० गोल अन्तरले हराउदै आयोजक सुर्यकिरण युबा क्लबले बिजयी शुरुवात गरेको छ । त्यस्तै, दोस्रो खेल चुरियामाई टोल बिकास संस्था र ऋषेश्वर टोल बिकास संस्था बीच २-२ गोलले बराबर भएको छ। उक्त खेल आज १२ बजे पछि पेनाल्टी मार्फत बिजेता घोषणा गरिने आयोजकले जनाएको छ।

मनहरी गाउँपालिका अध्यक्ष रन्जन कालाखेतीको प्रमुख आतिथ्यतामा उद्घाटन भएको उक्त कार्यक्रममा संबिधान सभा सदस्य राजाराम स्याङ्गतान, मनहरी गाउपालिका उपाध्यक्ष सीता पुलामी मगर, ५ नम्बर वडा अध्यक्ष दीपेन्द्र अधिकारी, वडा सदस्यहरु लगायत राजनीतिक दलका प्रतिनिधि, विभिन्न संघसस्थाका प्रतिनिधिहरुको आतिथ्यता रहेको थियो। कार्यक्रम क्लबका सचिब मिलन ढुंगानाको सभाध्यक्षतामा भएको थियो।

आज २२ गते तिन खेल हुँदै छ । शिखर टोल विकास संस्था ‘बि’ र बसन्तपुर टोल विकास संस्था, ऋषेश्वर टोल विकास र आयोजक सुर्यकिरण युवा क्लब बीच हुने छ भने त्यस्तै आजै शिखर टोल विकास संस्था ‘ए’ र चुरियामाई टोल विकास संस्था बीच हुने छ।