जेठ ७ देखि बागमती प्रदेश खेलकुद, ७९४ पदकको लागि १३ विधाका खेल हुने

जेठ, हेटौंडा – प्रदेश खेलकुद विकास परिषद् बागमती प्रदेशको आयोजनामा यहि जेठ ७ गतेबाट प्रदेशस्तरीय खेलकुद आयोजना हुने छ । दोस्रो संस्करणको प्रदेशस्तरीय खेलकुदमा विभिन्न १३ विधाका खेलहरु हुने भएका छने । प्रदेशभरका १३ जिल्लाका खेलाडीको सहभागितामा हुने खेलकुदमा विभिन्न ७ सय ९४ वटा पदकका लागि प्रतिष्पर्धा हुनेछ ।

प्रतियोगिताअन्तर्गत हेटौंडा, काठमाडौं, चितवन र ललितपुरमा विभिन्न खेलका प्रतिष्पर्धा हुनेछन् । परिषद्ले मंगलबार हेटौंडामा पत्रकार सम्मेलनको आयोजना गर्दै खेलकुद प्रतियोगितामा २ हजार पाँच सय २ जना खेलाडीले १३ विधाका खेलकुद प्रतियोगितामा भाग लिने जानकारी दिएको हो ।

खेलकुद अन्तर्गत फुटबल, भलिबल, एथलेटिक्स, तेक्वान्दो, कराते, बक्सिङ, उसु, जुडो, क्रिकेट, रग्बी, ब्याडमिन्टन, पौडी र आइटिएफ तेक्वान्दो प्रतियोगिता हुनेछ । खेलकुदमा २१९ वटा स्वर्ण पदक, २१९ वटा रजत पदक र ३ सय ५६ वटा कास्य पदकका लागि प्रतिष्पर्धा हुनेछ । हरेक प्रतियोगिताको प्रथम हुने समूह वा खेलाडीलाई जनही ५ हजार, द्वितीयलाई जनही ४ हजार र तृतीयलाई जनही ३ हजारका दरले पुरस्कार प्रदान गरिने प्रदेश खेलकुद विकास परिषद्का सदस्य सचिव सूर्यलाल भण्डारीले जानकारी दिए ।

प्रदेशमा खेल प्रतिभाको खोजी गर्नुका साथै खेलप्रति खेलाडी र अभिभावकको आकर्षण वृद्धिलगायत उद्देश्यका साथ सुरु हुन लागेको प्रदेश खेलकुद प्रतियोगिताको जेठ ७ गते उद्घाटन हुनेछ भने ८ गतेबाट खेल सुरु हुनेछ । जेठ ८ देखि १० गतेसम्म गौरीटार रंगशालामा महिला फुटबलको आयोजना हुनेछ भने पिप्ले क्याम्पा रंगशालामा ८ देखि १३ गतेसम्म फुटबल प्रतियोगिता हुनेछ । सोही रंगशालामा ८ देखि १० गतेसम्म एथ्लेटिक्स प्रतियोगिता तय गरिएको छ भने हेटौंडाको हुप्रचौरमा ८ देखि १० गते नै महिला तथा पुरुष भलिबल हुनेछ ।

जेठ ८ देखि १० गते नै हुप्रचौरमा रग्बी, कराते, तेक्वान्दो र आइटिएफ तेक्वान्दो प्रतियोगिता हुनेछ भने हेटौंडा कभर्डहलमामा ८ देखि १३ गतेसम्म बक्सिङको प्रतिष्पर्धा हुनेछ । थानाभर्याङमा ब्याडमिन्टन प्रतियोगिता हुनेछ भने उसु र जुडोको प्रतिष्पर्धा काठमाडौंमा हुनेछ । ललितपुरमा पौडी प्रतियोगिता तय गरिएको छ भने चितवनमा महिला तथा पूरुष क्रिकेट प्रतियोगिता तय गरिएको परिषद्का सदस्य सचिव भण्डारीले बताए । प्रतियोगिता उद्घाटन गर्न करिब साढे ९ करोड रुपैयाँ खर्च हुने अनुमान गरिएको छ ।