‘ए’ डिभिजन लिगमा मछिन्द्र शीर्ष स्थान उक्लियो

पुष, काठमाडौं – शीर्षस्थानमा रहेको मनाङ मर्स्याङ्दी क्लबलाई पराजित गर्दै मछिन्द्र फुटबल क्लब सहिद स्मारक ‘ए’ डिभिजन लिगको शीर्षस्थानमा उक्लिएको छ । शनिबार भएको खेलमा मनाङ मर्स्याङ्दी क्लबलाई १-० गोल अन्तरले हराउँदै मछिन्द्र शीर्ष स्थानमा उक्लिएको हो ।

दशरथ रंगशालामा भएको रोमान्चक खेलमा मछिन्द्रलाई जित दिलाउन सुनिल बलले निर्णायक गोल गरे । सुनिलले खेलको इन्जुरी समयमा फ्रि-किकबाट सुन्दर गोल गर्दै मछिन्द्रलाई महत्वपूर्ण ३ अंक दिलाएका हुन् ।

जित सँगै मछिन्द्रले ६ खेलमा १४ अंक जोडेको छ भने मछिन्द्र मनाङ भन्दा एक अंकले अघि रहेको छ । दोस्रो स्थानमा झरेको मनाङले ५ खेलमा १३ अंक जोडेको छ ।