रेडियो सरोबरद्धारा बनकरियालाई पाडो सहयोग
तामसालिङ खबर
असोज, हेटौंडा – रेडियो सरोबरले नेपालकै लोपोन्मुख बनकरिया समुदायलाई दशैं मनाउन पाडो सहयोग गरेको छ । मनहरी -४ ट्वाङग्रामा रहेको बनकरिया बस्तीमा पुगेर रेडियोका सञ्चालक एवं स्टेशन म्यानेजर राजु शाश्वत लामिछानेले एक थान पाडो सहयोग गर्नुभएको हो ।
यसैगरी,समाजसेवी राजेन्द्र सिम्खडा र सुरेन्द्र भट्टराईले बनकरिया समुदायलाई चिउरा र मसला सहयोग गर्नुभएको छ । बनकरिया बस्तीमा दशैं मनाउन समस्या भएको जानकारी आएपछि सामाजिक उत्तरदायित्व पुरा गर्ने उद्धेश्यले सहयोग गरिएको रेडियोका स्टेशन म्यानेजर लामिछाने बताउनुभयो ।
दशैं मनाउन मासु र चिउरा पाएपछि अगुवा सन्तमाया बनकरियाले खुशी व्यक्त गर्नुभयो । उहाँले बनकरिया बस्तीमा दशैं छाउने बताउनुभयो । बिगत ७ बर्षदेखि हेटौंडामा सञ्चालित रेडियो सरोबर ९२.५ मेगाहर्जले विभिन्न सामाजिक कार्यहरु गर्दै आइरहेको छ ।
मकवानपुरमा मात्रै बसोबास रहेको बनकरिया समुदायको मनहरि गाउँपालिका ४ ट्वाङ्ग्रामा २० घरधुरी रहेका छन् । उनीहरुको आफ्नै स्वामित्वमा एक धुर जमिन पनि छैन । खोलामा माछा मार्ने र जंगली कन्दमूल खाएर बनकरियाले आफ्नो जीविका चलाउने गरेका छन् ।
यो पनि पढ्नुहोस्
