वार्नरको २२ औं टेस्ट शतक
तामसालिङ खबर
पाकिस्तान विरुद्धको पहिलो टेस्ट क्रिकेटमा अस्ट्रेलियन ब्याट्सम्यानले उत्कृष्ट प्रदर्शन गरेका छन्। दोस्रो दिन शुक्रबारको खेल समाप्त हुँदासम्म अस्ट्रेलियाले पहिलो पालीमा ७२ रनको अग्रता लिइसकेको छ। अस्ट्रेलियाले पहिलो पालीमा केवल एक विकेट गुमाएर तीन सय १२ रन बनाइसकेको छ।
टस जिती पहिले ब्याटिङ रोजेको भ्रमणकारी टोली पाकिस्तान भने आफ्नो पहिलो पालीमा केवल दुई सय ४० रनमा समेटिएको थियो। अस्ट्रेलियाका लागि ओपनर ब्याट्सम्यान डेभिड वार्नर अविजित एक सय ५१ रन बनाउँदै क्रिजमा छन्। उनले दुई सय ६५ बलको सामना गरी १० चौका हिर्काइसकेका छन्। ३३ वर्षीय वार्नरको यो २२औं टेस्ट शतक हो।
वार्नर र जोय बर्नसले ओपनिङ विकेटका लागि दुई सय २२ रनको साझेदारी गरे। बर्नस केवल तीन रनका कारण पाँचौं टेस्ट शतक पूरा गर्नबाट चुके। ३० वर्षीय बर्नसले एक सय ६६ बलको सामना गरी १० चौकाको मद्दतले ९७ रन बनाए। उनी पाकिस्तानी बलर यासिर शाहको बलमा बोल्ड भएका थिए।
अस्ट्रेलियाका मार्नस लाबुसचाग्ने अविजित ५५ रन बनाउँदै क्रिजमा छन्। ९४ बलको सामना गरेका उनले ६ चौका हिर्काइसकेका छन्। टेस्ट क्रिकेटमा यो उनको छैटौं अर्धशतक हो।
यो पनि पढ्नुहोस्
